തിരികെ നീ വന്നീടുമോ..

മുറിവേറ്റ മുരളിക തേങ്ങുന്നു മെല്ലെ ,

കണ്ണാ നീയെവിടെ..

കാളിന്ദീതീരവും, ഗോവര്‍ദ്ധനവും നീ

തെല്ലും മറന്നുപോയോ..

കണ്ണാ,

തിരികെ നീ വന്നീടുമോ..


പ്രിയസഖി രാധയെ

മറന്നുവോ കണ്ണാ ഈ

ഗോപികമാരെയും

മറന്നുപോയോ

മധുരയിലെത്തിയാല്‍

തിരികെ വരുമെന്ന

വാക്കും മറന്നുപോയോ

കണ്ണാ,

തിരികെ നീ വന്നീടുമോ
..

ശരറാന്തല്‍ തിരിയിലെ

നിറദീപം പോലെയെന്‍

ഓര്‍മ്മകള്‍ പെയ്തിടുന്നു

വൃന്ദാവനത്തിലെന്‍

മാനസം പായുന്നു,

മയിലുകളാടിടുന്നു

കനവില്‍

കുയിലുകള്‍ പാടിടുന്നു.
.
കണ്ണാ,

തിരികെ നീ വന്നീടുമോ..


ഓര്‍മ്മകളോര്‍മ്മക-

ളെന്നെ തളര്‍ത്തുന്നു

കൃഷ്ണാ നീയെവിടെ..

പ്രിയസഖി രാധയെ

ഒരുനോക്കു കാണുവാന്‍

ഇനിയും വരാത്തതെന്തേ

കണ്ണാ,

തിരികെ നീ വന്നീടുമോ..