മണല്‍ നനയ്ക്കാത്ത തിരകൾ

നീ
ഒരു കടല്‍ പോലെ..
മണല്‍ ചിറകുകളെ
നനുത്തകയ്യാല്‍ തഴുകുന്ന
തിര പോലെ..

ഇളകുന്ന കടലല
നിന്റെ മനസിനെ ഓര്‍മ്മിപ്പിക്കും
ചിലപ്പോള്‍ ശാന്തമായും
ചിലപ്പോള്‍
രൌദ്രമായും..

ആഴക്കടലിലെ തിരപോലെ
എന്റെ മനസ്
തീരത്തമങ്ങുന്ന,നിന്റെ മണമുള്ള
മണല്ത്തരികളെ ചുംബിക്കാന്‍
അവയ്ക്കാകുന്നില്ല.

വേലിയിറക്കത്തില്‍
തിരകളുടെ തലോടലേല്ക്കാത്ത
വരണ്ട മണല്ത്തരികള്‍
എന്റെ ദു:സ്വപ്നങ്ങളാണ്
ഓരോ വേലിയേറ്റവും
സ്വപ്നം കണ്ട്,
വിരിയാന്‍ കാത്തിരിക്കുന്ന
മണല്‍ മൊട്ടുകള്‍ ..

ഓണം

മുനിഞ്ഞു കത്തുന്ന
പാട്ടവിളക്കിന്‍ ചാരെ
കുനിഞ്ഞ മുഖം താങ്ങി
മെലിഞ്ഞ, വളക്കൈകള്‍.

വരണ്ട കണ്‍കളില്‍
നിലച്ച നിലവിളി,
ചുണ്ടാല്‍ മറച്ചിരിക്കും
നരച്ച പേക്കോലം

ആശകള്‍ ചേര്‍ത്തു നെയ്ത
കൊച്ചു പൂക്കളത്തില്‍
മിഴികള്‍ നട്ടു വെച്ച്
ചെറിയ കുരുന്നുകള്‍

ഇഴഞ്ഞു നീന്തിയപോല്‍
ഇരുട്ടത്തൊരു രൂപം
തെറിച്ചു വീഴുന്നുണ്ട്
തെറി കഷണങ്ങള്‍...

പൂക്കളത്തില്‍ നിന്നും
പറിച്ചെടുത്ത,
പകച്ച കണ്ണുകള്‍,
കാണ്മൂ ചിതറിയ
ഓണവറ്റുകള്‍..