ചുംബനം

പ്രണയിനി ഭൂമിയെ ചുംബിച്ചുണർത്തുവാൻ

അർക്കനും തെല്ലിട മറന്നുനിന്നോ

അമ്മതൻ മേനിയിൽ മഴനൂൽക്കരങ്ങളാൽ 

ആലിംഗനം ചെയ്തുമ്മവെയ്ക്കാൻ

കാറ്റിൻ കരങ്ങളിൽ താലോലമാടുന്ന

കാർമേഘക്കുഞ്ഞും മറന്നുപോയോ.


ഈർപ്പക്കനിവിനായ്‌ വെയിലേറ്റുവാടിയ

അമ്മച്ചെടി തലതാഴ്ത്തി നിൽക്കെ

ഇതളുകിളിർത്തു തുടങ്ങിയ മലരിനെ 

ചുംബന പൂക്കളാൽ ഇക്കിളികൊള്ളിച്ച്

കരിവണ്ടും തക്കം പാര്ത്തു നിൽപ്പൂ 


വരളുന്ന കനവുകൾ നട്ടുനനച്ച്,

ആഴിതൻ മാറിലെക്കാർത്തു പതിക്കുവാൻ

ഇളകിത്തെറിച്ചുപതച്ച പുഴ 

ഭൂമിതൻ മാറില്‍ തളർന്നു കിടക്കു-

ന്നൊരുമേഘ ചുംബനത്താ-

ലുയർത്തെണീക്കാൻ.