അരികത്തിരിക്കൂ ഒരുമാത്ര,
നീയെന്റെ സ്പന്ദനം തൊട്ടറിയുന്നു..
കൊതിയോടെ ഞാനറിയുന്നു
നീയെന്റെ ജീവന്റെ നിഴലായിരുന്നു.
ചിറകറ്റുവീണോരെന്നാത്മദാഹങ്ങളെ
അലിവോടു നീ ചേര്‍ത്തുനിര്‍ത്തി
കനിവിന്റെ നീര്ത്തുള്ളി നല്‍കി,
നീയെന്നെ നിന്‍
പ്രാണനില്‍ ചേര്‍ത്തുവെയ്ക്കുന്നു.
ചിറകടിയൊച്ച നിലയ്ക്കുന്നതിന്മുന്നെ-
യെന്നരികത്തു നീയിരിക്കേണം
ചെഞ്ചായം പൂശിയോരാകാശദൂര-
മിന്നെന്നെ വിളിച്ചുണര്ത്തുന്നു.
ഹൃദയത്തില്‍ നിന്നും പറിച്ചെറിയാന്‍
വയ്യ, പ്രിയനേ നീയെന്റേതു മാത്രം
ആകാശവീഥിയില്‍ നിന്നെപ്രതീക്ഷിച്ചു
നില്‍ക്കും ഞാന്‍, നീ വരുവോളം...
No comments:
Post a Comment