കണ്ണടവച്ച സൗഹൃദം.

എനിക്ക് കുറെ സൌഹൃദങ്ങളുണ്ട്.
പലതും കണ്ണട വെച്ചതാണ്.
ചിലത് അന്ധന്മാരുടെതു മാതിരി.

ചിലവ
ഒരു കണ്ണിന് കോണ്‍വെക്സും
മറ്റേതിന് കോണ്‍കേവും
വളഞ്ഞേ കാണൂ.

ചിലതോ...
വളരെ ഭംഗിയുള്ളത്.
ചിരിച്ചങ്ങനെ നില്‍ക്കും.
എവിടെയാണ് കുഴപ്പം..
തിരിച്ചറിയുക പ്രയാസം.

മറ്റു ചിലവ
കാണാന്‍ ഭംഗിയുണ്ടാവില്ല
എന്നാല്‍ അവയുടെ കാഴ്ച
ആഴത്തില്‍ പതിഞ്ഞിട്ടുണ്ടാവും.
വേര്‍തിരിച്ചെടുക്കല്‍
സാധ്യവും.

എന്തായാലും ഒരു കണ്ണട,
എനിക്കും തിരഞ്ഞെടുക്കണം.

സമര്‍പ്പണം.

എപ്പോഴാണ്
ആ കണ്ണുകളിലെ തീഷ്ണത
എന്റെ ഹൃദയത്തില്‍ ഉടക്കിയത്..
മിഴികള്‍ എപ്പോഴോ
പുണര്‍ന്നതും,
അഗ്നിസ്ഫുലിന്ഗങ്ങള്‍
ഹൃദയത്തിന്റെ അടിത്തട്ട് വരെ..
ഉള്ളില്‍ പ്രണയത്തിന്റെ ഊഷ്മളത.
പൂത്തിരി കത്തുന്നതുപോലെ,
ഒരു ലഹരി ഉടലാകെ പൊതിയുന്നു.
ഓരോ അണുവിലും
കുതിച്ചെത്തുന്ന രക്തത്തില്‍
പ്രണയമാണോ..

കുറച്ചു ഇണക്കങ്ങളും,
കൂടുതല്‍ പിണക്കങ്ങളും.
ആ പരിഭവ തിളക്കങ്ങളിലും,
നിന്നെ ഞാനറിയുന്നതുപോലെ
വേറെ ആരറിയുന്നു.

നിന്റെ ഓര്‍മകളെ
ഞാന്‍ പുല്കുംപോഴും,
ഓര്‍ക്കുമ്പോഴും
നീ തുമ്മി കണ്ണുനിറയ്ക്കുമോ?
ഏതൊരു നിമിഷമാണ്
പ്രിയനേ..
നിനക്കെന്നില്‍ നിന്ന്
സ്വാതന്ത്ര്യം ലഭിക്കുക..

നിന്റെ തീഷ്ണ പ്രണയനിറങ്ങളില്‍
മുങ്ങി നിവരുവാന്‍
നീയെന്നെ അനുവദിക്കുക.
നിന്റെ ചുടു നിശ്വാസങ്ങളില്‍
ഒരു കുളിര്‍ കാറ്റായ്‌
ഞാനലിയട്ടെ.

നമുക്കായ് മാത്രം
ഋതുക്കള്‍ കറങ്ങട്ടെ..
നിന്റെ പ്രണയ വേഗങ്ങളില്‍,
കൊടും തപം ചെയ്ത്
ഞാനെന്റെ പ്രാണന്
മുക്തി നല്കിക്കൊള്ളാം..

കോപം.

ഇപ്പോഴും കൂടെയുണ്ട്.
ചിലപ്പോള്‍ പുറകെ.
മറ്റു ചിലപ്പോള്‍ മുന്നില്‍
വികൃതശരീരവും,അളിഞ്ഞ മുഖവും.
എപ്പോഴൊക്കെയോ-
തലയുയര്‍ത്തി നോക്കും,
പല്ലിളിച്ചു കാട്ടും.
ഇറക്കി വിടാന്‍ പറ്റില്ല
ഒതുക്കി നിര്‍ത്തുകയെ തരമുള്ളൂ
എന്തിനാണ്
നീയെന്നെ ഇങ്ങനെ
പിന്തുടരുന്നത്..
......................



സംശയം..


പുറകില്‍നിന്നു വിളിക്കരുതെന്ന്
മുത്തശ്ശി പറഞ്ഞിട്ടും
അമ്മേയെന്നലറി വിളിച്ചതുകൊണ്ടാവും
സ്വര്‍ഗ്ഗത്തിലേക്കുപോയ
എന്റമ്മ മടങ്ങി വരാത്തത്.

കാറ്റിനോട്...

ജനാല വാതില്‍
മെല്ലെ തുറക്കാന്‍-
ശ്രമിക്കുന്ന കാറ്റിന്
ഇന്നെന്തേ
ഇത്ര ഇളക്കം.
ഒന്നെത്തിനോക്കി,
നാണിച്ചു മുഖംതിരിക്കുന്ന
പെണ്ണിനേപ്പോലെ..
ഓരോ ചുവടും
അതി മൃദുലമാക്കി,
വന്നൊന്നു തഴുകി-
യൊളിക്കുന്ന കാറ്റിന്
എന്തോ പറയാനുള്ളതുപോലെ.

കാര്യം പറ കാറ്റേ
നിന്റെ കാമുകനെ കണ്ടുവോ..
അവന്‍ നിന്നെ
ആലിംഗനം ചെയ്തുവോ
പ്രണയത്തിന്റെ-
നാണമോ നിന്റെ കണ്ണില്‍..

എങ്കില്‍ അരുത്.
മുന്നില്‍ വളരെ ദൂരത്തല്ലാതെ
ദീര്‍ഘമായ്‌ താണ്ടേണ്ട
ജീവിതപ്പാടം
തരിശ്ശായ് കിടക്കുന്നു.
ഇരുവശത്തും,
മോഹക്കാഴ്ചകള്‍ കാണാം.
അത് വെറും മിഥ്യ.
അല്പദൂരത്തായുണ്ട്
മുള്ളുകള്‍ നിറഞ്ഞ
കയറ്റിറക്കങ്ങള്‍.
കാറ്റേ...,
ഓരോ ചുവടും
വളരെ ശ്രദ്ധിച്ച്....

9 Oct 

delete

ഇടവഴി.

അന്ന് 

ആ ഇടവഴിയില്‍
വേലികള്‍ ഇല്ലായിരുന്നു
ഒരു ചെറിയ ഇളക്കത്തോടെ-
തുള്ളിത്തെറിച്ചെത്തിയ കാറ്റിന്
ലജ്ജപുരണ്ട ചിരിയും,
സ്നേഹത്തിന്റെ നറുമണവും.
വഴിയുടെ ഇരുപുറവും
സ്നേഹത്തിന്റെ കാല്‍പ്പാദങ്ങള്‍
ആഴത്തില്‍ പതിഞ്ഞിരുന്നു.
ഇന്ന്
കനത്ത മുഖവും,
കനച്ച മണവുമായി
ഇടവഴിയെ മറച്ചു മതിലുകള്‍.
ചോരച്ച മണം പുരണ്ട കാറ്റ്
അടക്കിപ്പിടിച്ച് കരയുന്നു.
കണ്ണുകളില്‍ നിന്ന് വീഴുന്നത്,
രൂക്ഷഗന്ധം പേറുന്ന,കറുത്തരക്തം.
കീറിപ്പറിഞ്ഞ മഞ്ഞ വിരിപ്പുകൊണ്ട്
നാണം മറയ്ക്കാന്‍,
വൃഥാ ശ്രമിക്കുന്ന ഭൂമി.
വേലികളുടെ മുകളിലൂടെ,
കൂണുപോലെ പൊന്തുന്ന-
കുഞ്ഞു മുഖങ്ങള്‍..
അവയുടെ നിഷ്കളങ്കതയിലും
നാളത്തെ ചുടലക്കളത്തിന്റെ
അവ്യക്ത രേഖകള്‍.
ചെവിയില്‍ സദാ-
മരണത്തിന്റെ ഇരമ്പല്‍.

വെയില്‍ കനക്കുന്നതിനു മുന്നേ
എനിക്കാ ഇടവഴി താണ്ടണം.

എന്റെ പട്ടം.

അവന്റെ പ്രണയം
കെട്ടുപൊട്ടിയ പട്ടംപോലെയാണ്.
എവിടെ ചെന്നെത്തുമെന്ന് ഒരു രൂപവുമില്ല.
എങ്ങോട്ടെന്നോ, എത്രമാത്രമെന്നോ
പ്രവചിക്കാനും സാധ്യമല്ല.

ചിലപ്പോള്‍
ആകാശത്തെ മുട്ടുമെന്നു തോന്നിക്കും
ചിലപ്പോള്‍
കാറ്റിലും,കോളിലും പെട്ടതുപോലെ ആടിയുലഞ്ഞ്..
മറ്റു ചിലപ്പോള്‍
ശാന്തമായി അങ്ങനെ ഒഴുകി...

ഇപ്പോള്‍ ഞാന്‍ പ്രാര്‍ത്ഥിക്കുന്നത്
ആ പട്ടം-
എവിടെയും തടയപ്പെടരുതെന്നും,
താഴെ പതിക്കരുതെന്നുമാണ്.
അത്രയേറെ,
അതില്ലാതെ പറ്റില്ലെനിക്ക്..

പുതിയ ആകാശം..

ചേക്കാറാനൊരു ചില്ല മോഹിച്ചാണ്

അച്ഛനെയും അമ്മയെയും ഉപേക്ഷിച്ച്
അവള്‍ അരയാലിന്റെ കൂട്ടുപിടിച്ചത്.

ഇടതൂര്‍ന്ന ചില്ലകളും,
കരുത്തുറ്റ ശിഖരങ്ങളും കണ്ട്
അതിലൊരു കൂടുകൂട്ടണമെന്ന്
അവള്‍ കൊതിച്ചു.

അരയാലിന്റെ മാറില്‍നിന്ന്
ആകാശത്തേക്ക് പറന്നുയരാന്‍
എളുപ്പമായിരിക്കുമെന്നും,
അവിടെ പുതിയ നക്ഷത്രങ്ങള്‍
അവള്‍ക്കായി കാത്തിരിക്കുമെന്നും
അവള്‍ സ്വപ്നം കണ്ടു.

ഒരിക്കല്‍
ആകാശത്തേക്ക് പറന്ന്,
തിരികെയെത്തിയപ്പോള്‍ കണ്ടു
ചുണ്ടു ചുവപ്പിച്ച കുറെ പക്ഷികള്‍..

ചാഞ്ഞും, ചരിഞ്ഞും നോക്കി
വിലയുറപ്പിച്ച്
അവളെ ചേര്‍ത്തു പിടിച്ചപ്പോള്‍
അന്തിച്ചവള്‍ അരയാലിനെ നോക്കി.
പക്ഷെ
അരയാലൊന്നു ചിരിച്ചു.
അവന്റെ നീണ്ടു കൂര്‍ത്ത ദംഷ്ട്രകളും,
ചോരച്ച നാവും കണ്ടപ്പോഴാണ്-
എല്ലാം കിളിപ്പെണ്ണു തിരിച്ചറിഞ്ഞത്.