തുമ്പിക്കുഞ്ഞേ....

തുമ്പിക്കുഞ്ഞേ....
നിന്നോട് ഞാന്‍ പറഞ്ഞതല്ലേ

കൈതക്കാട്ടില്‍ പോകരുത്,
പാമ്പുണ്ടാകും എന്ന്?
എന്നിട്ടും...

ഞാന്‍ പറഞ്ഞതല്ലേ
കൈതപ്പൂവിന്റെ മണം
മാസ്മരികമാണ്,
അതില്‍ മയങ്ങരുത് എന്ന്?
പിന്നെയും....

കൈതയില്‍ തൊടരുത്
മുള്ളു കൊള്ളും എന്നും
എത്രയോ തവണ
പറഞ്ഞതല്ലേ?
കേട്ടില്ല...

അതല്ലേ.
കൊത്തുകൊണ്ട് അവശയായി
നീ കിടന്നതും,
മുള്ള് കൊണ്ട് കീറിയ
നിന്റെ പുള്ളിച്ചിറക്
ദൂരെ പോയതും,
നിന്റെ മുകളില്‍
കൈത പിഴുതുവീണതും...

ഞാന്‍

എനിക്കുറക്കെ ചിരിക്കണം
ദിഗന്തങ്ങള്‍ പൊട്ടുമാറുച്ചത്തില്‍,

അലറിച്ചിരിക്കണം..

എനിക്ക് രണ്ടു മുഖം
ഒന്ന്,
ചിരിക്കുന്ന,ശാന്തമായത്
ചപല, കലഹപ്രിയ..
കഴമ്പില്ലാത്തവള്‍
പുരുഷ മേധാവിത്വം,
മൂകമായി അനുഭവിക്കുന്നവള്‍..

മറുവശം
പല്ലിറുമ്മി,
കടലുപോലെ രൌദ്രമാര്‍ന്ന്,
പുറമേ ശാന്തയായ്‌
ചുഴികളും, അഗ്നിപര്‍വ്വതങ്ങളും
ഉള്ളിലൊതുക്കി,
വെളുക്കെ ചിരിച്ച്
എതിരാളിയെ മയക്കി,
ചുഴികളില്‍ കറക്കി, വരിഞ്ഞു മുറുക്കി,
ശ്വാസം മുട്ടിച്ച്,
ആഴങ്ങളിലേക്ക് വലിച്ചെറിയുന്ന
രുദ്ര.

എനിക്ക്
ശീലാവതിയാകണ്ടാ
കണ്ണകിയാകണം.
ചടുലതാളത്തില്‍
താണ്ടവമാടണം
ചവുട്ടിയരയ്ക്കണം
കാപാലിക ശിരസ്സ്.

ഒടുവില്‍
എനിക്ക് തലയുയര്‍ത്തിപ്പിടിച്ചു പറയണം.
ഞാനാണ് സ്ത്രീ.

വിധി

കോലായിലെ ചാരുകസേരയില്‍ 
ആര്‍ക്കുംവേണ്ടാത്തൊരു വാര്‍ദ്ധക്യം 
 തൊട്ടരുകില്‍ കൂട്ടിനായ്‌
കാലൊടിഞ്ഞ കാലന്‍കുടയും,
നരച്ച, പ്ലാസ്റ്റിക്‌ കോളാമ്പിയും.
ഓളം തട്ടിയപോലൊരിളം വെയില്‍,
ഒന്നെത്തിനോക്കി മടങ്ങി.
പീളകെട്ടിയ കണ്ണുകളില്‍
ഭാവം നിസ്സംഗതയോ..
കഴുത്തില്‍ തെളിയുന്ന,
ചെറു ഞരമ്പുകളില്‍
സൂക്ഷിച്ചു നോക്കിയാല്‍ കാണാം
ദുര്‍ബല ഹൃദയത്തിന്‍
ചെറു തുടിപ്പുകള്‍.
ഒരു ദീര്‍ഘ നിശ്വാസത്തില്‍
അടഞ്ഞ മിഴിപ്പോളയില്‍,
തിരിച്ചറിവായി
ജീവന്റെ നേര്‍ത്ത ചലനങ്ങള്‍
ഒടുവില്‍
കാലം തിരസ്കരിക്കുന്ന ജീവനെ
തിരിച്ചു പിടിക്കാനാവാതെ,
കീഴടങ്ങുമ്പോള്‍
തൊടിയിലെ അവസാന മാവും
തന്റെ വിധിക്ക് കീഴടങ്ങുന്നു.

ഇരുവര്‍..

"സീതേ..."
"ഓ , സുശീല അക്കന്‍"

"അമ്പലത്തില്‍ പോകാന്‍ ഇറങ്ങിയതാ
ഇതുവഴി കയറാം എന്ന് കരുതി."
ഒരര്ച്ചന,ഒരു ശത്രു സംഹാരം...
ചുറ്റിനും ശത്രുക്കളാടീ "
"ഇരിക്ക് അക്കാ.."
"ഇരിക്കാന്‍ സമയമില്ല..
നീയറിഞ്ഞോ സീതേ..
അപ്പുറത്തെ രമയുടെ മകള്‍
ആശുപത്രീലാ."
"അയ്യോ... എന്തുപറ്റി?
നല്ലൊരു കൊച്ച്"
"ആ നല്ല കൊച്ച്
എന്നെകൊണ്ടോന്നും പറയിക്കണ്ടാ
അവളേ...
മറ്റേ പരിപാടിക്ക്
കൊണ്ടോയതാ..
അബോര്‍ഷം..
രാവിലെ മുതല്‍
ഒക്കാനോം, വേദനേം.
ആരും അറിയത്തില്ലെന്നാ
അവറ്റോടെ വിചാരം."
"അക്കാ.. ആ കൊച്ചിന്
അപ്പന്റിസൈറ്റിസ് ആണ്.
വേണ്ടാതീനം പറയാതെ
പോകാന്‍ നോക്ക്.."

...........................

"എടീ ശാന്തേ.."
"ഓ. ശുശീല അക്കന്‍"
"അമ്പലത്തില്‍ പോണവഴി
കേറിയതാ..
അവളില്ലേ..., ആ സീത
...............................
...............................

പ്രതിനിധി.

ഐസ് ക്രീം വേണമെന്ന്
വാശിപിടിക്കുന്ന മകളോട്
അതിന്റെ ദോഷവശങ്ങളെക്കുറിച്ച്
പറഞ്ഞിട്ടും,
ഒരു കൂസലും ഇല്ല.
അവള്‍ ഈ കാലഘട്ടത്തിന്റെ
പ്രതിനിധി ആണത്രേ.
ഒരു തവണയെങ്കിലും
ഐസ് ക്രീം കഴിച്ചില്ലെങ്കില്‍
എന്താ ഒരര്‍ത്ഥം..
അത് കഴിച്ചാലുണ്ടാകുന്ന
ഗുണങ്ങളെപ്പറ്റി
വാതോരാതെ അവള്‍ പറഞ്ഞത്
കുറേശ്ശെ എനിക്കും മനസിലായി.
അമ്മേ.
"എതിര്‍ക്കുന്നതിലല്ല കാര്യം
ശേഷമുണ്ടാകുന്ന നേട്ടം
ഓര്‍ത്താല്‍...
ചേര തൊലിയുരിയുന്നത്
കണ്ടിട്ടില്ലേ?
പിന്നീട് പുതിയ തൊലി.
അത്രേയുള്ളൂ ഇതൊക്കെ..."

നേര് തന്നെ.
എനിക്കും എല്ലാം മനസിലായി.
പുഴയോരത്തൊരു വീടുവെക്കണം.
ഭാവിയില്‍
ഒരു പുഴ തന്നെ സ്വന്തമാകാന്‍
സാധ്യത കാണുന്നുണ്ട്.

വാര്‍ത്ത

പണ്ട്
മോഷണത്തെക്കുറിച്ച്
എനിക്കൊരു ഐഡിയയും
ഇല്ലായിരുന്നു.
രാവിലെ,
പത്ര വായന ശീലമാക്കിയത്തില്‍ പിന്നെ
മോഷണം ഒരു തൊഴിലാക്കിയാലോ
എന്നെനിക്കും തോന്നി.
മോഷണത്തെക്കുറിച്ചുള്ള
ഹരം പിടിപ്പിക്കുന്ന വാര്‍ത്തകള്‍
ചായക്കൊപ്പം എന്റെ ശീലമായി.
മോഷണത്തിനുവേണ്ടി,
മോഷ്ടാവനുഭാവിക്കുന്ന ബുദ്ധിമുട്ടോര്‍ത്ത്
എന്റെ ടെന്‍ഷന്‍ കൂടി.
വിവിധ ഉപായങ്ങളെ
മനസ്സില്‍ കൂട്ടിയിണക്കി, അടുക്കി...
അവനിറങ്ങും ഒരു യോദ്ധാവിനെ പോലെ.
എങ്ങാനും പാളിപ്പോയാല്‍... ഈശ്വരാ..

മോഷണത്തിന്റെ പല വഴികള്‍
വിശദമായി തന്നെ വര്ണ്ണിച്ചിടുണ്ടല്ലോ
പത്രത്താളുകളില്‍.
എനിക്കിപ്പോള്‍ ചിന്ത,
മോഷണകലയെക്കുറിച്ച് ചിത്രങ്ങള്‍ സഹിതം.
ഒരു പുസ്തകമിറക്കിയാലോ എന്നതാ.

കണ്ണുകള്‍

കണ്ണുകള്‍കൊണ്ട്
അളവെടുക്കുന്നവരെ കുറിച്ച്
എന്താ നിന്റെ അഭിപ്രായം?
അവരുടെ കണ്ണുകളിലും
കുന്നുകളും കുഴികളുമുണ്ടോ,
അവിടെയാണോ 
ആസക്തിയുടെ അളവുകോല്‍?

നിന്റെ കണ്ണുകള്‍
പരന്നതാണോ?
എങ്കില്‍
എന്റെ കൂടെ വരൂ..
എന്റെ നിമ്നോന്നതങ്ങള്‍
നീ കാണാതിരിക്കുമല്ലോ..

അല്ലെങ്കില്‍ അല്പം നില്‍ക്കൂ..,
ഞാനൊരു പര്‍ദ്ദ ധരിക്കട്ടെ.